Она тилим – жону дилим

Китобхонлик танловининг мақсади – ўзбек тили халқимиз учун миллий ўзлик ва мустақил давлатчилик тимсоли, бебаҳо маънавий бойлик, мамлакатимизнинг сиёсий-ижтимоий, маънавий-маърифий тараққиётида ғоят муҳим ўрин эгаллаб келаётган буюк қадрият эканлигини, Ватанимиз мустақиллигининг маънавий асосларини мустаҳкамлаш, ёш авлодни миллий қадриятларимизга муҳаббат ва садоқат руҳида тарбиялашда ўзбек тилининг аҳамияти тобора ортиб бораётганини ёшларимиз қалбига сингдиришдан иборат.

Тадбир Ўзбекистон Ёзувчилар уюшмаси ҳамда Алишер Навоий номидаги Тошкент давлат ўзбек тили ва адабиёти университети билан ҳамкорликда ташкил этилди.

Қўмита раиси ўринбосари Азамат Тошев байрам арафасида қабул қилинган Ўзбекистон Республикаси Президентининг “Мамлакатимизда ўзбек тилини янада ривожлантириш ва тил сиёсатини такомиллаштириш чора-тадбирлари тўғрисида”ги фармони ҳамда “Буюк шоир ва мутафаккир Алишер Навоий таваллудининг 580 йиллигини кенг нишонлаш тўғрисида”ги қарори барча туркий тилли халқлар учун чинакам совға бўлганлигини таъкидлади.

Ҳозирги кунда ўзбек тили ҳаётимизнинг барча жабҳаларида – давлат ва жамият бошқаруви, давлатлараро муносабатлар, илм-фан, таълим-тарбия, тиббиёт, маданият ва санъат соҳаларида фаол қўлланмоқда.

Она тилимизнинг халқаро минбарлардан баралла янграётгани, Ўзбекистон тараққиётининг бугунги янги босқичи – миллий юксалиш даври талабларидан келиб чиқиб, она тилимизнинг жамиятдаги ўрни ва нуфузини ошириш бўйича кенг кўламли ишлар амалга оширилаётганлиги барчамизга чексиз фахр ва мамнуният бағишламоқда.

Тадбирда она тилимизга, урф-одат ва қадриятларимизга ҳурмат, Ватанга меҳримизни амалий фаолиятда намоён этишимиз кераклиги таъкидланди.

Ёшлар ўртасида китобхонлик танловида Алишер Навоий номидаги Тошкент давлат ўзбек тили ва адабиёти университетининг талабалари атоқли ўзбек шоирларининг она тилимиз ҳақидаги шеърлари билан фаол иштирок этди.

Тадбир якунида танлов ғолиблари аниқланди. 1-ўринга Севара Қўшаева, 2- ўринга Паризода Рўзибоева ва 3- ўринга Икромжон Бобомуродов муносиб топилди.

Ғолибларга қўмита томонидан жаҳон ва ўзбек адабиётининг энг сара намуналаридан иборат китоблар тўпламлари топширилди.